Oblys ortalyǵynda ornalasqan 10 kópqabatty turǵyn úı men 3 mekteptiń shatyry búlinip, elektr jelisiniń 3 baǵanasy jáne 40-qa jýyq aǵash qulaǵan. Sondaı-aq, 20 baǵdarsham isten shyqqan. Búgin Jambyl oblysynyń ákimi Berdibek Saparbaev daýyldan búlingen turǵyn úıler men nysandardy aralap shyqty.
Jambyl dańǵylyndaǵy №123 úıdiń 120 sharshy metrlik shatyryn jel ushyryp áketken. Úı osydan 60 jyl buryn salynypty. Biraq, osy ýaqytqa deıin birde-bir ret kúrdeli jóndeýden ótpegen. Berdibek Saparbaev atalǵan úıdiń jaǵdaıymen tanysyp, turǵyndarmen áńgimelesti. «Jańbyr jaýǵan kezde shatyrdan sý aǵyp ketpeýi úshin ýaqytsha jabyn ornatylady. Degenmen, kún jylyǵannan keıin termojańǵyrtý baǵdarlamasy aıasynda úıge jóndeý jumystaryn júrgizý qajet», dedi ákim. Sondaı-aq, qalanyń 15-shaǵynaýdanyndaǵy №16 úıdiń aýmaǵy 1000 sharshy metrden asatyn shatyry da qatty jelden ushyp ketken. Bes qabatty turǵyn úı ótken jyly paıdalanýǵa berilgen. Shatyrdyń qulaýy kezinde kórshi úıdiń balkony men aýlada turǵan birneshe kólikke zaqym kelgen. Abyroı bolǵanda, adam shyǵyny oryn alǵan joq. Qazirgi tańda aýlany qoqystan tazartý, elektrmen qamtýdy qalpyna keltirý jumystary júrgizilýde. Atalǵan turǵyn úıdiń qurylysyn júrgizgen merdiger barlyq jumystar normatıvter men bekitilgen jobaǵa sáıkes atqarylǵanyn aıtty. «Shatyr men kórshi úıdiń zaqymdanǵan bóligin qalpyna keltirý merdiger kompanııanyń moınyna júktelýi tıis. Shatyrdy qysqa merzimde qalpyna keltirý qajet. Endi mundaı oqıǵalardyń qaıtalanýyna jol berilmeýi kerek. Eger tek aýa-raıy ǵana sebep bolsa, onda basqa úılerdiń de shatyrlary ushyp ketetin edi ǵoı. Bul jerde qurylys sapasyna qatysty másele bar», dedi Berdibek Saparbaev.
Búginde Taraz qalasynda daýyldyń saldaryn joıý boıynsha jumystar júrgizilýde. Kóshelerdi qulaǵan aǵashtardan tazartý jalǵasýda. Áýeli kólik qozǵalysyna kedergi keltirmeý úshin joldar tazartyldy. Alaıda, qala turǵyndarynan elektr qýatymen qamtýdaǵy aqaýlarǵa qatysty ótinishter túsýde. Qazirgi kezde bul sharalarǵa 20 brıgada jumyldyrylǵan. Berdibek Saparbaev Taraz qalasynyń ákimi Aıtqazy Qarabalaevqa jel zardaptaryn joıý jumystaryn jedeldetýdi tapsyryp, búlingen mektepter dúısenbi kúnge deıin qalpyna keltirilýi tıis ekenin atap ótti.
